Kapoora Dish Ka Shari Hukum

’’کپورہ ڈش‘‘ کا شرعی حکم

سوال: کیا فرماتے ہیں علماء کرام و مفتیان عظام اس بارہ میں کہ فیصل آباد و لاہور کی طرح بڑے شہروں میں بکرے کے عام طور پر ’’کپورے‘‘ ہوٹلوں پر استعمال کیے جا رہے ہیں اسے ’’کپورہ ڈش‘‘ کہا جاتا ہے۔ اس کا شرعاً کیا حکم ہے؟

الجواب بعون الوھّاب

صورتِ مسؤلہ میں حلال جانور کے بھی چند اجزاء ایسے ہیں جن کا کھانا شرعاً درست نہیں ہے، حدیث شریف میں ہے کہ حضرت نبی کریم ﷺ نے بکرے کے یہ اجزاء ناپسند فرمائے ہیں مثلاً: نر و مادہ کی شرمگاہیں، کپورے، غدود، پتہ، مثانہ، بوقت ذبح بہنے والا خون۔ الفاظ حدیث ذیل میں ہیں۔

محمد قال اخبرنا عبدالرحمن بن عمرو الاوزاعی عن واصل بن ابی حمیل عن مجاھد قال کرہ رسول اللّٰہ صلی اللّٰہ علیہ وسلم من الشاۃ سبعا المرارۃ و المثانۃ و الغدۃ و الحیا و الذکر و الانثیین و الدم و کان رسول اللّٰہ صلی اللّٰہ علیہ وسلم یحب من الشاۃ مقدمھا․ (کتاب الاٰثار، ص۱۸۷، باب ما یکرہ من الشاۃ)۔

حضرات فقہاء کرام رحمۃ اﷲ علیہم نے بھی فرمایا ہے کہ جیسے دوسری چیزیں مکروہ تحریمی ہیں اسی طرح کپورے بھی مکروہ تحریمی ہیں لہٰذا ان کا کھانا، بیچنا، پکانا شریعت اسلامیہ میں مکروہ تحریمی (یعنی حرام کے قریب) ہے۔ (بدائع الصنائع،ج۵،ص۶۱۔ البحر الرائق،ج۸،ص۴۸۵۔ فتاویٰ عالمگیریہ،ج۵،ص۳۹۰۔ طحطاوی علی الدر،ج۴،ص۳۶۰۔ مراسیل ابی داؤد،ص۷)۔

نیز بیمار کو بھی پرہیز کرنا چاہیے جبکہ ان کے متبادل حلال چیزوں سے علاج ہو سکتا ہے تو غلیظ چیز سے علاج کیوں کریں۔ فقط واللّٰہ اعلم بالصواب

                                                                                                                                کتبہٗ العبد محمد اعظم ہاشمی غفرلہٗ الغنی

                                                                                                                                ۲۳؍رمضان المبارک۱۴۲۸ھ

تصدیق

محقق العصر حضرت مولانا مفتی سیّد عبدالقدوس ترمذی صاحب مدظلہم

۔(صدر مفتی جامعہ حقانیہ ساہیوال ضلع سرگودھا)۔

الجواب صحیح

                                                                                                                                احقر عبدالقدوس ترمذی غفرلہٗ

                                                                                                                                جامعہ حقانیہ ساہیوال سرگودھا

                                                                                                                                 ۲۸؍۱۰؍۲۸ھ

یہ فتویٰ اپنے پاس محفوظ کرنے یا پرنٹ لینے کے لیے یہاں کلک کیجیے۔