Azan Ke Sath Salat O Salam Ka Shari Hukum

اذان کے ساتھ (مروجہ) صلوٰۃ و سلام کا شرعی حکم

سوال: کیا فرماتے ہیں علمائے دین اس مسئلہ میں کہ حضرت نبی علیہ الصلوٰۃ و السلام کے مؤذنین میں سے کسی مؤذن نے اذان کے ساتھ آج کل پڑھا جانے والا صلوٰۃ و سلام پڑھا ہے یا نہیں؟

الجواب باسم شارع الاحکام

حضرت سیدنا محمدصلی اللہ علیہ وسلم نے جو اذان صحابہ کرام رضی اﷲ عنہم کو بتائی یا سکھائی وہ اللّٰہ اکبر سے شروع ہو کر لآ الٰہ الا اللّٰہ پر مکمل ہو جاتی ہے جیسا کہ (مسلم شریف ص۶۵ تا ۶۷، ابوداؤد ص۸۰ ج۱، ابن ماجہ ص۵۱، اعلاء السنن ص۹۴ ج۲، البدایہ و النہایہ ص۲۳۲ ج۳ عربی وغیرہم) کتب احادیث میں موجود ہے اس پر زائد کلمہ الصلوٰۃ خیر من النوم حضرت نبی علیہ الصلوٰۃ والسلام نے اپنے صحابی حضرت ابومحذورہ رضی اﷲ تعالیٰ عنہٗ کو صبح کی اذان میں خود سکھایا ہے (ابوداؤد ص۷۹ ج۱) اور ایک کلمہ قد قامت الصلوٰۃ اقامت میں سکھایا ہے۔(ابوداؤد ص۸۰ ج۱)۔

دورِ نبوت کے چار مؤذن:

حضرت نبی علیہ الصلوٰۃ و السلام کی موجودگی میں عام طور پر چار مؤذنوں نے اذانیں پڑھی ہیں: (۱) سیدنا بلال (۲) سیدنا عبداﷲ ابن مکتوم (یہ دونوں مدینہ منورہ میں) (۳)سیدنا ابو محذورہ (مکہ مکرمہ میں) (۴)سیدنا سعد قرظی (مسجد قبا میں) رضی اﷲ عنہم اجمعین۔ جیسا کہ صحیح مسلم شریف اور اس کی شرح میں موجود ہے:

عن ابن عمر قال کان لرسول اللّٰہ صلی اللّٰہ علیہ وسلم مؤذنان بلال و ابن ام مکتوم الاعمی قال العلامۃ النووی تحت ھذا الحدیث مؤذنان یعنی بالمدینۃ فی وقت واحد و قد کان ابومحذورۃ مؤذنا لرسول اللّٰہ صلی اللّٰہ علیہ وسلم و سعد القرظ اذن لرسول اللّٰہ صلی اللّٰہ علیہ وسلم بقباء مرات․ (ج۱ص۶۵)۔

انتباہ:

ذخیرہ احادیث و فقہ و تاریخ میں کہیں بھی ثابت نہیں کہ اﷲ کے رسول صلی اللہ علیہ وسلم نے یا حضرات صحابہ کرام رضی اﷲ تعالیٰ عنہم نے یا حضرات ائمہ مجتہدین (امام ابوحنیفہ، امام مالک، امام شافعی، امام احمد) رحمہم اﷲ تعالیٰ نے اذان کے شروع یا آخر میں ’’الصلوٰۃ والسلام علیك یا رسول اللّٰہ‘‘ پڑھا یا پڑھایا ہو۔ دیکھیے علامہ شعرانی کی کتاب ’’کشف الغمۃ۔ قال شیخنا لم یکن التسلیم الذی یفعلہ المؤذنون فی ایام حیاتہ صلی اللّٰہ علیہ وسلم و لا الخلفاء الراشدین (ص۸۷ج۱) فمن ادعیٰ فعلیہ البرھان․

مروجہ صلوٰۃ و سلام تاریخ کے آئینہ میں:

جب حاکم مصر مخذول نامی شیعہ قتل ہوا تو اس کا بیٹا تخت نشین ہوا جبکہ مخذول کی بہن (جو فاطمی شیعہ تھی) نے مؤذنوں کو حکم دیا کہ وہ اذان کے بعد موجود حاکم (جو مخذول کا بیٹا ہے) پر سلام پڑھا کریں چنانچہ اس کا آغاز ربیع الثانی عشاء کی نماز پیر کی رات ۷۸۱ھ کو مصر میں ہوا ہر مؤذن اذان کے بعد یہ کہتا ’’السلام علی الامام الطاھر‘‘ پھر جمعہ کے دن بھی شروع کروا دیا چنانچہ دس سال تک سوائے مغرب کی اذان کے ہر نماز کی اذان کے بعد پڑھا جاتا رہا پھر سلطان ناصر الدین بن ایوب کا دور آیا تو اس نے ’’الصلوٰۃ و السلام علی رسول اللّٰہ‘‘ ۷۹۱ھ میں شروع کروایا یہ مصر کے سارے شہروں اور دیہاتوں میں پڑھا جاتا رہا۔

وفی الدر المختار: التسلیم بعد الاذان حدث فی ربیع الآخر سنۃ سبع مائۃ واحدی و ثمانین فی عشاء لیلۃ الاثنین ثم یوم الجمعۃ ثم بعد عشر سنین فی الکل الا المغرب …… الخ (ص۳۶۲ ج۱)۔

و فی کشف الغمہ: کان فی ایام الروافض بمصر شرعوا التسلیم علی الخلیفۃ و وزراہ بعد الاذان فلما تولی صلاح الدین بن ایوب فابطل ھذا البدع و امر المؤذنین بالصلوٰۃ و التسلیم علی رسول اللّٰہ امر بھا اھل الامصار و القریٰ․ (ص۷۸ ج۱)۔

و فی الفتاویٰ الکبریٰ لابن حجر مکی: …… احدث المؤذنون الصلوٰۃ و السلام علی رسول اللّٰہ صلی اللّٰہ علیہ وسلم عقب الاذان للفرائض الخمس …… الا المغرب فانھم لا یفعلونہ غالبا لضیق و قتھا …… و سبب ذلك ان الحاکم المخذول لما قتل امرت اختہ المؤذنین ان یقولوا فی ولدہ السلام علی الامام الطاھر․ (۱۳۱ ج۱)

و فی المدخل لابن حاج: …… ینبغی ان ینھاھم عما احد ثوہ من صفۃ الصلوٰۃ و التسلیم علی النبی صلی اللّٰہ علیہ وسلم …… و اصل احداثہ من قبل المشرق و تقدم الحدیث عنہ علیہ الصلوٰۃ و السلام بقولہ الفتنۃ من ھھنا و اشار الی المشرق․ (ص۲۵۶ ج۲، م بیروت)۔

موجودہ صلوٰۃ و سلام:

’’الصلوٰۃ و السلام علی رسول اللّٰہ‘‘ کے الفاظ میں فقط دو حرفوں (ک، یا) کا اضافہ کر کے ’’الصلوٰۃ و السلام علیک یا رسول اللّٰہ‘‘ بنا لیا گیا یہ نام نہاد پاکستانی سنی بریلوی افراد (جو درحقیقت بدعتی ہیں) نے دین میں اضافہ کا جرأت مندانہ اقدام کیا اور اذان کے اول و آخر میں پانچوں اوقات نماز میں شروع کر کے محبوب نبی صلی اللہ علیہ وسلم کی محبت سنت (طریقہ اذان) کا حلیہ و نقشہ عشق ومحبت کی صدا لگا کر بگاڑا (معاذ اﷲ) بقول علامہ اقبال مرحوم ؂

رہ گئی رسم اذاں روح بلالی نہ رہی                   فلسفہ رہ گیا تلقین غزالی نہ رہی

یہ امت رسومات میں کھو گئی                         افسوس! سنت بدعات میں کھو گئی

شرعی حیثیت:

اذان کے اول و آخر میں کوئی بھی کلمہ جو شریعت میں صحابہ کرام و ائمہ مجتہدین سے ثابت نہیں خواہ وہ صلوٰۃ و سلام ہو یا کوئی اور کلمہ شرعاً بدعت ہے جیسا کہ فتاویٰ عالمگیریہ میں بدعت کی تعریف کی گئی ہے …… ’’بدعۃ لم ینقل عن الصحابۃ و التابعین‘‘ (کتاب الکراہیۃ ج۵ ص۳۱۷) و فی شرح المقاصد: ’’ان البدعۃ المذمومۃ ھو المحدث فی الدین من غیر ان یکون فی عھد الصحابۃ و التابعین و لا دل علیہ الدلیل الشرعی‘‘ یعنی جس بدعت کی مذمت شریعت میں ثابت ہے وہ وہی بدعت ہے کہ دین میں کوئی ایسی نئی بات نکالی جائے جو نہ حضرات صحابہ کے وقت میں تھی اور نہ حضرات تابعین کے، اور نہ اس پر کوئی دلیل شرعی قائم ہو۔ (ج۲ ص۲۷۱ فصل ثالث مبحث ثامن) البتہ روضہ رسول صلی اللہ علیہ وسلم پر حاضری کے وقت خطاب کے صیغہ سے یعنی الصلوٰۃ والسلام علیک یا رسول اللّٰہ پڑھنا شریعت سے ثابت ہے، جیسا کہ چاروں مسالک کی کتب فقہ میں باب زیارت قبرالنبی صلی اللہ علیہ وسلم کے تحت موجود ہے۔

ہدایت:

اس لیے جو حضرات اذان کے ساتھ صلوٰۃ و سلام پڑھنے کی بدعت کر رہے ہیں ان پر اس بدعت اور دیگر تمام بدعات سے توبہ کرنا واجب ہے اگر بدعت سے توبہ نہ کی تو ظالموں میں شمار ہو گا۔ ’’فلا تقعد بعد الذکرٰی مع القوم الظالمین‘‘ (سورہ انعام،پارہ ۷)، اس لیے آئندہ سنت کے مطابق اذان صحیح ادائیگی کے ساتھ بغیر کسی کلمہ کے اول و آخر میں ملائے پڑھیں جیسا کہ احادیث مبارکہ سے اذان ثابت ہے ورنہ وہ پڑھنے والے بدعمل بدعتی ہوں گے اگر بغیر توبہ کیے مر گئے تو قیامت کے دن فرشتے ان کے چہروں کو حوض کوثر سے پھیر دیں گے۔ جیسا کہ حدیث میں ہے: قال علیہ السلام:…… ’’یا عثثمان لا ترغب عن سنتی فمن رغب عن سنتی و مات قبل ان یتوب صرفت الملائکۃ وجھہ عن حوضی‘‘ (تفسیر کبیر پارہ نمبر۸ ص۶۶) ’’من بدل او غیر او ابتدع فی دین اللّٰہ …… فھو من المطرو دین عن الحوض‘‘ (تفسیر قرطبی ص۱۶۸ ج۴ مصری) ایک حدیث میں ہے کہ بدعتی جہنم کے کتے ہیں عبارت یہ ہے: ’’اصحاب البدع کلاب النار‘‘ (کنز العمال ص۲۱۸ ج۱ فصل فی البدع)چونکہ بدعت کی وجہ سے دین کی صورت بدعتی نے مسخ کی اسی طرح بدعتی کا چہرہ جہنم میں کتے کی طرح مسخ ہو گا۔ (العیاذ باﷲ) نیز شاہ عبدالعزیز محدث دہلوی رحمۃ اﷲ علیہ فرماتے ہیں کہ ہر ایسی چیز کہ اس پر صاحب شریعت صلی اللہ علیہ وسلم نے ترغیب نہ فرمائی ہو اور نہ اس کا تعین کیا ہو وہ کام فضول ہے اور نبی صلی اللہ علیہ وسلم کی سنت کے مخالف ہے اور مخالفت سنت حرام ہے اس لیے ہرگز جائز نہیں۔ فتاویٰ عزیزی میں ہے کہ ہر چیز کہ برآں ترغیب صاحب شریعت و تعین نہ باشد فعل عبث است و مخالفت سنت حرام است ہرگز روا نہ باشد۔ (ص۹۸ ج۱)۔

سیدنا عمر بن عبدالعزیز رحمۃ اﷲ علیہ کی عظیم خواہش:

اگر اﷲ تعالیٰ ہر بدعت کو میرے ہاتھوں سے مٹا دے اور ہر سنت کو میرے ہاتھوں سے زندہ کر دے اور اس راہ میں میرے جسم کا ایک ایک ٹکڑا کام آئے یہاں تک کہ آخر میں میری جان بھی چلی جائے تو اﷲ کی راہ میں یہ بہت ہی معمولی قربانی ہو گی۔ عربی عبارت یہ ہے:

فلو کان کل بدعۃ یمیتھا اللّٰہ علی یدی و کل سنۃ یبعثھا اللّٰہ علی یدی ببضعۃ لحمی حتی یاتی اخر ذلك علی نفسی کان فی اﷲ یسیرا۔ (طبقات ابن سعد)۔

حرفِ آخر:

علامہ شیخ احمد رومی حنفی رحمۃ اﷲ علیہ نے اپنی کتاب مجالس الابرار میں فرمایا ہے کہ اذان کے اندر منارہ کے اوپر اس کی عادت کر لینا یعنی صلوٰۃ و سلام کی شریعت سے ثابت نہیں اس لیے کہ اس کو نہ صحابہ اور نہ تابعین میں سے کسی نے کیا ہے اور نہ پیشوایان دین میں سے کسی اور نے کیا ہے اور کسی کو یہ اختیار نہیں کہ عبادات کو ان مقامات کے سوا جہاں شریعت نے ان کو مقرر کیا ہے اور جس کو سلف کرتے چلے آئے ہوں کسی اور وقت یا جگہ میں مقرر کرے دیکھو قرآن کی تلاوت باوجودیکہ سب سے بہتر عبادت ہے لیکن مکلف کو یہ جائز نہیں کہ رکوع، قومہ، سجود یا قعدہ میں پڑھے کیونکہ ان میں سے کوئی بھی تلاوت کا محل نہیں ہے۔ (ص۳۵۲ مجلس۴۸ مترجم) لہٰذا اس پر فتن دور میں اپنے عقائد اہل سنت و الجماعت کے مطابق رکھیں اور اعمال میں شرک و بدعات سے خود بھی بچیں اور اولاد کو بچائیں ورنہ آخرت میں کھلا خسارہ ہو گا اور عالمی رسوائی ہو گی اﷲ تعالیٰ ہم سب کی حفاظت فرمائے آمین۔

اذان کے جواب کا مسنون طریقہ:

حدیث شریف میں ہے کہ جب تم مؤذن کی اذان سنو تو وہی کلمے تم کہو جو مؤذن کہے پھر مجھ پر صلوٰۃ پڑھو اور میرے لیے دعائے وسیلہ (اللھم رب ھذہ الدعوۃ التامۃ والصلوٰۃ القائمۃ اٰت محمد ان الوسیلۃ و الفضیلۃ وابعثہ مقاما محمودا ن الذی وعدتہ۔ بخاری شریف ج۱ ص۸۶۔ اور انك لا تخلف المیعاد سنن بیہقی ص۴۱۰ ج۱ میں موجود ہے) پڑھو (مسلم شریف ص۶۶ ج۱) نیز صلوٰۃ سے مراد درود ابراہیمی ہے جو نماز میں پڑھا جاتا ہے دیکھئے ترمذی شریف ’’عن کعب بن عجرۃ و کیف الصلوٰۃ علیك قال قولوا اللھم صل علی محمد و علی اٰل محمد…… الخ (ص۶۴ ج۱ باب ما جاء فی صفۃ الصلوٰۃ علی النبی صلی اللّٰہ علیہ وسلم) نیز اذان کی دعا میں والدرجۃ الرفیعۃ کے الفاظ ثابت نہیں۔ (دیکھئے فتاویٰ شامی ص۳۷۹ ج۱) اور وارزقنا شفاعتہ یوم القیامۃ کے الفاظ بھی صحیح حدیث سے ثابت نہیں اس لیے اضافہ سے پرہیز کریں۔…………    فقط واللّٰہ الموفق والمعین

                                                                                                                                کتبہٗ العبد محمد اعظم ہاشمی غفرلہٗ الغنی

                                                                                                                                مدرس جامعہ حقانیہ ساہیوال سرگودھا

                                                                                                                                مورخہ ۲۵ ربیع الاول سنہ ۱۴۲۳ھ

تصدیق و توثیق

فقیہ ِوقت حضرت مولانا مفتی سیّد عبدالقدوس ترمذی صاحب مدظلہم

(مہتمم و مفتی جامعہ ھٰذا)

الجواب بھذا التفصیل صحیح

مروجہ صلوٰۃ و سلام قبل اذان و بعدہ کے بدعت ہونے میں کوئی شک و شبہ نہیں یہ بدعت سیۂ اور واجب الترک ہے، روضہ اقدس کے سامنے خطاب کے الفاظ میں سلام پڑھنا سنت سے ثابت ہے اور مستحب ہے کیونکہ وہاں براہ راست آپ صلی اللہ علیہ وسلم کا سننا اور جواب دینا روایات حدیث سے ثابت ہے اس کے علاوہ خطاب کے الفاظ یا رسول یا نبی سے صلوٰۃ و سلام کا پڑھنا اگر اس عقیدہ سے ہو کہ آپ ہر جگہ حاضر و ناظر ہیں تو یہ کھلا شرک ہے اور اگر اس عقیدہ سے خطاب ہو کہ آپ مجلس میں تشریف لاتے ہیں تو یہ آپ صلی اللہ علیہ وسلم کی ذات گرامی پر بہتان و افتراء ہے اور اگر ان دونوں صورتوں میں سے کوئی صورت نہ ہو تو بھی چونکہ یہ الفاظ موہم شرک ہیں اس لیے اس طرح خطاب کرنا تب بھی منع اور ناجائز ہے اس ناجائز عمل پر اصرارکرنا یہ دوسرا گناہ ہے، اور فرض و واجب کی طرح اس کو ضروری سمجھنا تیسرا گناہ ہے اور اس میں شریک نہ ہونے والے بے گناہ مسلمانوں کو برا بھلا کہنا اور مطعون کرنا چوتھا گناہ ہے اور مساجد میں آواز بلند کر کے دوسرے مشغول حضرات کے شغل میں خلل انداز ہونا پانچواں گناہ ہے جو عمل اتنے گناہوں کا سبب اور مجموعہ ہو وہ کیسے جائز ہو سکتا ہے؟ ترک سنت اور ایجاد بدعت کا یہی نتیجہ ہوتا ہے کہ سنت ختم ہو کر اس کی جگہ بدعت آ جاتی ہے جو کئی مفاسد اور گناہوں کا مجموعہ بنتی ہے اﷲ تعالیٰ مسلمانوں کو سنتوں پر عمل کرنے کی توفیق اور گناہوں نیز بدعات سے بچنے کی ہمت عطا فرمائیں۔ آمین۔

تفصیل کے لیے حضرت مفتی اعظم پاکستان مفتی محمد شفیع قدس سرہٗ کی کتاب ’’جواہرالفقہ‘‘ (ص۲۱۲ ج۱) ملاحظہ کی جائے۔ فقط واللّٰہ اعلم بالصواب

                                                                                                                                احقر سیّد عبدالقدوس ترمذی غفرلہٗ

                                                                                                                                جامعہ حقانیہ ساہیوال سرگودھا

                                                                                                                                ۲۷ ربیع الاول ۱۴۲۳ھ

یہ فتویٰ اپنے پاس محفوظ کرنے یا پرنٹ لینے کے لیے یہاں کلک کیجیے۔