Qabar e Shari Ki Tareef Aur Azab o Sawab Ki Haqiqat

قبرِ شرعی کی تعریف اور عذاب و ثواب کی حقیقت

سوال: کیا فرماتے ہیں علماء کرام درج ذیل مسئلہ میں کہ اہلسنت و الجماعت کے نزدیک مرنے کے بعد اس مٹی والی عرفی قبر میں عذاب و ثواب صرف جسم کو ہوتا ہے یا صرف روح کو یا دونوں کو، فتویٰ کس بات پر ہے؟ یا عذاب و ثواب ہوتا ہی نہیں؟ مرنے کے بعد اور قبر کی تعریف کیا ہے؟ کچھ لوگ زمینی قبر کو قبر ہی نہیں مانتے۔

الجواب باسم الوھّاب

تمام اہلسنت و الجماعت اس بات پر متفق ہیں کہ مرنے کے بعد قبر میں روح اور بدن دونوں کو اکٹھے ایک دوسرے کے تعلق کے ساتھ اعمال کے مطابق عذاب و ثواب ہوتا ہے البتہ معتزلہ اور خارجی، رافضی یعنی شیعہ لوگ اس عقیدہ کے منکر ہیں۔

و فی الشامیۃ: قال اھل السنۃ و الجماعۃ عذاب القبر حق …… فیعذب اللحم متصلا بالروح متصلا بالجسم فیتا لم الروح مع الجسد․ (باب الجمعۃ،ج۱،ص۶۱۰، مصری قدیم)۔

ایضاً: و لا یرد تعذیب المیت فی قبرہ لانہ توضع فیہ الحیٰوۃ عند العامۃ بقدر ما یحس بہ الالم و البنیۃ لیست بشرط عند اھل السنۃ ……․ (ج۳، ص۲۰۱،شامی)۔

و فی شرح المقاصد: اتفق الاسلامیون علٰی حقیۃ سوال منکر و نکیر فی القبر و عذاب الکفار و بعض العصاۃ فیہ و نسب خلافہ الٰی بعض المعتزلہ․ (ج۲،ص۲۴۰، المبحث السادس)۔

ایضاً: قال فی خاتمہ: اتفق اھل الحق علیٰ ان اللّٰہ یعید الی المیت فی القبر نوع حیٰوۃ قدر ما یتالم و یتلذّذ و یشھد بذٰلك الکتاب و الاخبار و الاٰثار․ (ج۲، ص۲۴۲)۔

و فی الشرح لعقیدۃ الطحاویۃ: کذٰلك عذاب القبر یکون للنفس و البدن جمیعًا باتفاق اھل السنۃ و الجماعۃ․ (ص۳۳۰)۔

و فی تنقیح الرواۃ علٰی المشکٰوۃ: مذھب اھل السنۃ اثبات عذاب القبر خلافًا للخوارج و المعتزلۃ …… فانھم نفوا ذٰلك. (ج۱، ص۳۱،۳۲)۔

تنبیہ: مرنے کے بعد میت کا جسم یا جسم کے ذرّات جہاں کہیں ہوں وہی اُس کی قبر ہے، خواہ اس مٹی والی عرفی، شرعی قبر میں یا غرق ہو گیا ہو یا جل گیا ہو وغیرہ، وہیں اُس سے روح کے تعلق کے ساتھ سوال و جواب اور عذاب و ثواب ہو گا جیسا کہ قرآن کریم میں میت کے دفن ہونے کی جگہ کو بھی قبر کہا گیا ہے (پارہ نمبر۱۰ آیت نمبر۸۴ سورۃ التوبۃ) اور حدیث میں بھی دفن ہونے کی جگہ تو قبر کہا گیا ہے دیکھیے ۔بخاری شریف ج۱ ص۱۷۸۔ ان العبد اذا وضع فی قبرہٖ الخ اور شارحینِ حدیث نے بھی تائید کی ہے، دیکھیے مرقاۃ شرح مشکوٰۃ (ج۱،ص۱۹۷)، عبارت یہ ہے: کُلُّ مَوْضِعٍ فِیْہ مَقَرُّۃٗ فھو قَبْرُہٗ۔ یعنی ہر ایسی جگہ جس میں میت قرار پکڑتا ہے وہی اُس کی قبر ہے۔ اسی طرح حکیم الامت مجدد الملت شاہ اشرف علی حنفی چشتی رحمۃ اﷲ علیہ بھی فرماتے ہیں: حقیقت قبر کی محلِ وجودِ میت ہے (امداد الفتاویٰ،ج۴،ص۴۶۷) اسی طرح حکیم الامت کے خلیفۂ مجاز علامہ سید سلیمان ندوی رحمۃ اﷲ علیہ فرماتے ہیں: اب ظاہر ہے کہ یہ بعث (قبر سے اٹھنا) صرف انھی مردوں کے لیے مخصوص نہیں جو تودۂ خاک کے اندر دفن ہوں بلکہ ہر میت کے لیے ہے خواہ وہ کسی حالت اور کسی عالَم میں ہو اسی لیے قبر سے مقصود ہر وہ مقام ہے جہاں مرنے کے بعد جسمِ خاکی نے جگہ حاصل کی (سیرۃ النبی،ج۴،ص۶۳۸) اور بعض اکابر سے جو عبارات مذکورہ بالاتعریفات سے مختلف ثابت ہیں ان کے بارے حضرت مفتی محمد عبداﷲ ڈیروی رحمۃ اﷲ علیہ (مفتی اول خیرالمدارس ملتان)کی عبارت یہ ہے: بعض حضرات نے جو قبر سے مراد عالمِ برزخ لیا اور گڑھے کے قبر ہونے کی نفی کی ہے اس سے مقصود تعمیم (یعنی قبر عام ہے) اور قبر کو گڑھے میں منحصرسمجھنے کی نفی ہے (خیرالفتاویٰ:ج۳، ص۲۲۸) یعنی قبر کا مفہوم عام ہے صرف اسی زمینی گڑھے کو قبر نہیں کہتے بلکہ ہر وہ جگہ جہاں میت کے ذرّات یا جسم ہو چاہے وہ زمین کے پیٹ میں ہو یا پانی کے پیٹ میں یا درندہ کے پیٹ میں تو یوں کہنا درست ہے کہ یہ زمینی گڑھا بھی قبر ہے تاکہ قرآن و حدیث و فقہ کی صریح نصوص کا انکار لازم نہ آئے۔

اس لیے صورت مسؤلہ میں اسی زمینی قبر میں بھی عذاب و ثواب بتعلقِ روح ماننا شرعاً ضروری ہے وگرنہ فاسق، مُعلن، بدعتی خارج از اہلسنت و الجماعت ہو گا۔ (مزید تفصیل کے لیے ’’حیات انبیاء کرام‘‘ از فقیہ زماں حضرت مولانا مفتی سیّد عبدالشکور ترمذی رحمۃ اﷲ علیہ، ’’تسکین الصدور‘‘ از امامِ اہلسنت حضرت مولانا سرفراز خان صفدر رحمۃ اﷲ علیہ اور ’’مقامِ حیات‘‘ از علامہ خالد محمود صاحب دامت برکاتہم وغیرہ ملاحظہ ہوں) و فی ھٰذا کفایۃ لمن لہ درایۃ․

……………………………………                                                                                           فقط واللّٰہ اعلم

                                                                                                                                کتبہ محمد اعظم ہاشمی غفرلہٗ الغنی

                                                                                                                                مدرس جامعہ حقانیہ ساہیوال سرگودھا

                                                                                                                                ۲۶؍رجب ۱۴۲۲ھ

تصدیق

محقق اہلِ سنت حضرت مولانا مفتی سیّد عبدالقدوس ترمذی صاحب مدظلہم

۔(صدر دارالافتاء جامعہ حقانیہ ساہیوال ضلع سرگودھا)۔

الجواب بھذ التفصیل صحیح

                                                                                                                                احقر عبدالقدوس ترمذی غفرلہٗ

                                                                                                                                ۲؍رمضان المبارک ۱۴۲۲ھ

یہ فتویٰ اپنے پاس محفوظ کرنے یا پرنٹ لینے کے لیے یہاں کلک کیجیے۔