Hazrat Ali (RA) Ke Madfan Ki Tahqeeq

حضرت علی بن ابی طالب رضی اﷲ عنہ کے مدفن کی تحقیق

سوال: کیا فرماتے ہیں علماء کرام اس بارہ میں کہ سیدنا علی المرتضیٰ رضی اﷲ عنہ کی قبر مبارک کہاں ہے؟ اور وہ روایت کہ آپ کے جنازہ ہو جانے کے بعد آپ کی نعش کو ایک اونٹنی پر رکھ دیا گیا وہ نامعلوم کہاں چلی گئی، یہ صحیح ہے یا نہیں؟ اہلسنت محققین کی تحقیق سے آگاہ کریں۔

الجواب بعون الوھّاب

)۱(سیدنا علی رضی اﷲ عنہ کو غسل حضرت حسن، حضرت حسین، حضرت عبداﷲ بن جعفر طیّار رضی اﷲ عنھم نے دیا اور حضرت حسن رضی اﷲ عنہ نے جنازہ پڑھایا اورچار تکبیریں پڑھیں۔ (المستدرک للحاکم، ج۳، ص۱۴۳) جنازہ سے فراغت کے بعد دفن کا مسئلہ پیش آیا تو آپ کو جامع مسجد کوفہ کے قریب رَحْبَہ کے مقام پر (جو ابواب کندہ کے ساتھ ہے) نماز فجر سے پہلے رات ہی کو دفن کیا گیا۔ (طبقات ابن سعد، ج۳، ص۲۵، قسم اول تحت علی بن ابی طالب)۔

(۲)سیدنا علی رضی اﷲ عنہ کو ۴۰؁ھ کو ۶۳سال کی عمر میں شہید کیا گیا …… اور دارالامارت میں جامع مسجد کوفہ کے قریب دفن کیا گیا۔ (تاریخ ابن جریر طبری، ج۳، ص۳۶۰، حصہ دوم مترجم، تحت حضرت علی کی عمر)۔

(۳)مشہور روایت کے مطابق ’’کوفہ‘‘ کے دارالامارت ہی میں شب کو دفن کیے گئے۔ (فضائل صحابہ و اہلبیت، ص۱۶۱، از علامہ محمد علی حسین البِکْری مدینہ منورہ، ناشر شبیر برادرز لاہور)۔

(۴)مؤرّخ اسلام علامہ ابن کثیر رحمۃ اﷲ علیہ فرماتے ہیں کہ کوفہ کے دارالامارت میں ہی سیدنا علی رضی اﷲ عنہ کو دفن کیا گیا۔ عام قبرستان میں دفن نہ کرنے کی وجہ یہ تھی کہ خارجیوں (جھوٹے شیعان علی) کی طرف سے خطرہ تھا کہ کہیں وہ آپ کی نعش مبارک کی توہین اور بے حرمتی نہ کریں یہی قول مشہور ہے۔ اور جو لوگ آپ کی نعش مبارک کو ایک سواری کے ذریعے نامعلوم جگہ بھیج دینے کے قائل ہیں یہ اُن کا قول غلط ہے نہ عقلاً درست ہے اور نہ شرعاً درست ہے۔ اور بعض جاہل رافضی شیعوں کا یہ جو عقیدہ ہے کہ حضرت علی کی قبر نجف اشرف میں ہے یہ بھی بے دلیل ہے، و فی البدایہ و النھایہ:دفن بدار الامارۃ بالکوفۃ …… ھذا ھو المشھور و من قال انہ حمل علی راحلتہ …… فقد أخطأ …… و ما یعتقدہ کثیرون جھلۃ الروافض من ان قبرہ بمشھد النجف …… لا اصل لہٗ (ج۷، ص۳۲۹، تحت صفۃ مقتل علی) ……………………………………………………………………………………                      فقط واللّٰہ اعلم بالصواب

                                                                                                                                حررّہٗ العبد محمد اعظم ہاشمی غفرلہٗ الغنی

                                                                                                                                                ۲۰؍فروری ۲۰۱۱؁ء

تصدیق

محقق العصر حضرت مولانا مفتی سیّد عبدالقدوس ترمذی صاحب مدظلہم

صدر مفتی جامعہ حقانیہ ساہیوال ضلع سرگودھا

الجواب صحیح

                                                                                                                                                احقر عبدالقدوس ترمذی غفرلہٗ

                                                                                                                                                ۲۷؍شوال ۱۴۳۲؁ھ

یہ فتویٰ اپنے پاس محفوظ کرنے یا پرنٹ لینے کے لیےیہاں کلک کیجیے۔